自我介紹
我係Colin，一個語言愛好者。我鍾意學語言 ，亦都鍾意語言學。我母語係廣東話 （香港粵語），細個喺學校學英文同普通話，亦都學過日文、韓文同德文。我發覺自己越係接觸得多外語，就越係激起咗「語言」本身嘅科學理論嘅興趣。最後，我唔單止中意「學語言」，連「語言學」都中意埋。聽歌係我嘅興趣，亦都係學語言嘅方法之一。日文歌同廣東歌係我嘅摯愛。大個開始接觸語言學之後，就對以前聽開嘅歌有咗新嘅體會。「點解廣東歌要填啱音？」、「點解日文歌唔使押韻？」之類之類。之後開始自己研究下廣東歌詞嘅語言學原理，亦都試吓自己作粵語歌詞，感受吓填詞人嘅難處。
Blog介紹
歡迎嚟到 CL Cantonese! 呢個Blog 本身打算分享一啲有關粵語嘅語言知識同個人見解，不過一直停留喺醞釀階段，仲未成事。如果可以成事，我會想寫下以下題材︰- 粵語填詞
- 日文翻譯
- 粵語語言學（大眾化嘅）
而家主要暫時擺住啲自己寫嘅 日文翻譯歌詞 同埋 粵語填詞作品。作品數量唔多，亦都未必高質，純屬個人興趣。
衷心期望呢個Project可以開始～
